DAGUPAN CITY– Anggapoy anengneng ya sintomas o senyales na ina na waloran taon ya ogaw ya nansakit na Japanese Encephalitis virus diad baley na Sison, Pangasinan.
Onong ed kinen Maricar Doctolero, nanay na biktima ya si Lyka Mea Cauton ya taga Sison, anggapoy anengneng dan senyales o sintomas na dengue diad say anak da.
Inkuwanto ya nen Miyerkules ed linmabas ya simba, naimano dan makapoy so laman na biktima balet linmoob nid klase to nen agew na Huwebes balet nen kaaguwan sinmempet iya ya ampetang la.
Pinainom day tambal so anak da bangbalet sa nen Sabado na kabuasan so man-uta la tan manbetel so biktima.
Sabado na ngarem, tampol ya inbatik da la iyad emergency room na Rosario La Union Hospital bangbalet agga naantaan na saray doctor so sasakiten na ogaw.
Simbay kabuwasan, inrekomenda na saray doctor ya nannengneng ed ogaw ya iyalis diad San Fernando, La Union makasengeg ta grabe la so sitwasyon na biktima balet lapud kaandian na kuwartan ibayar dad hospital bill agdara inabuluyan ya makaalis diad abitlan ospital.
Inaboloyan labat iran unalis nen mitongtong so byenan dan itilak so ID tonya piyan sikaray makaalis.
Naandi ni pulso na biktima diad loob na ambulansya kanyan diad Agoo, La Union ya kulaan na sangkaasinggeran ya ospital so angawitan dad ogaw piyan napapawil so pulso tonya.
Pinmaway diad pansuri daray doctor na Ilocos Training and Regional Medical Center ya wala la ed stage 4 na tatawegen ya Japanese Encephalitis.
Ginawa met so polaing na saray doctor diad abitlan ospital piyan nailigtas so anak da bangbalet lapud grabe lay sakit na ogaw so binawian ya na bilay.
