DAGUPAN CITY– Inatey so duwaran katao kasumpalan ya akuryente diad nanduruman lugar diad luyag na Pangasinan.
Say plimiron biktima so sakey ya 9 anyos ya ogaw diad baley na Malasique . Kinabat iya ya si Cjay Pascua, grade 3 pupil tan residente na Brgy Lunec, Malasique.
Say istorya na ina ton si Leonila Pascua, intilak to labat lay anak to diad loob na abong da piyan mitongtong diad abay da.
Nen saya so pinmawil asabian to la so anak ton andi lad bilay. Papanisiaan ya akuryente iya nen binenbenan toy akataoy ya electric cable wire.
Agmetla akaabot diad patambalan so sakey ya 60 anyos ya lola diad baley na Mangatarem kasumpalan iyan akuryente.
Kinabat so biktima ya si Myrna Serquinia , residente na Brgy Bantay, Mangatarem.
Intilak iya na anak to ta akitolor ed kanayon da balet nen pinmawil, asabian to lay ina to ya andi lad bilay tan saya so papanisiaan ya akuryente.
