Apatiran lalaki, inatey kasumpalan ya abangga na truck diad Urdaneta City

DAGUPAN CITY- Inatey so apatiran lalaki kasumpalan iran abangga na sakey ya truck diad barangay Nancayasan, Urdaneta City .

Onong ed impormasyon, paarap diad baley na Rosales, Pangasinan so truck nen natalapos tonya so akaparadan motorsiklo ya pankayaryan nen Joel Apungol ya residente na Bataan.

Diad kasil na inpakabangga binmantak so biktima diad kanal.

Abangga ni na truck so sakey nin motorsiklo ya walad arapan to walay lugan toran menor de edad ya lalaki. Nipasilong ni so motorsiklo diad abitlan truck.

Naibatik nid patambalan iray biktima bangbalet indeklara ran dead on arrival.

Desidido so pamilya na saray biktima ya segepan na kaso so abitlan driver na truck.