DAGUPAN CITY- Siyamiran totoo so inatey kasumpalan ya nalner ed apalabas ya kuwaresma diad luyag na Pangasinan.
Kinabat iray biktima ya sikara di Darwin Castrence , 31 anyos manlalapud Brgy Mal-Ong, Anda, Artemio Villegas, 35 anyos na Brgy Sta Cruz, San Jacinto tan Louie Aviles, 34 anyos ya residente na Brgy Domalandan East Lingayen , parehon nalner lapud inpakabuwek.
Inatey met so 23 anyos ya si Stanford Laudit, 23 anyos, taga Quezon City ya nalner diad beach resort ed Brgy Patar diad baley na Bolinao. Legan ya nalner met so bisitan nanlapu nid Tarlac ya si Marjun Alnas diad baley na Alcala.
Posiblen inatake ed sakit ton epelipsy so 15 anyos ya balolaki ya si Kenneth Camba, residente na Brgy Amagbagan, Pozzorubio kanyan nalner diad dayat. Kaleganan ya papanisiaan ya inatake ed sakit tod puso so 81 anyos ya masiken ya si Desimprado Garcia na Labuan San Quintin antes iyan nalner diad San Fabian Beach.
Maneermen met so pamilya na biktiman si Oliver Abaoag, 7 anyos kasumpalan ya nalner diad swimming pool ed baley na Pozzorubio. Linma so pamilya to diad abitlan resort piyan manrelax tan diman icelebrate so kwaresma balet agda ilaluan ya diman umpatey so biktima.
Nalner met so sakey ya ogaw ya mantaon na duway taon diad abitlan lugar. Kinabat so biktima ya si Jun Rey Sandoval, residente na Brgy Away San Jacinto. Pangasinan.
