DAGUPAN CITY — Pinaneknekan na Pangasinan Police Provincial Office (PPPO) ya anggapoy pulis day ed luyag ya alanor ed “Pay-per-Kill” modus ya inbulgar na Amnesty International (AI).
Kumpiyansa si P/Supt. Jackie Candelario, Deputy Provincial Director for Operations (DPDO) tan spokesperson met na PNP Pangasinan, ya imbaga ton anggapoy miyiembro na PNP Pangasinan ya adawit ed sangkabaloan lamet ya modus ya ibabato natan ed PNP.
No nanunutan, kasumpalan ya naibulgar so ‘Tokhang-for-ransom’ lapud kapapatey na biktiman Korean businessman ya si Jee Ick Joo, ‘Tanim-shabu’, extortion na pituran pulis ed talura met ya Korean National ed Angeles, Pampanga, et pinakabalon abulgar so alegasyon ya “Pay-per-Kill” modus ya inbunyag na Amnesty International (AI) no iner et ibabagan walay natatanggap ya bayar na bawat pulis ya makapatey na sangkot ed iligal ya droga ya konektado ed OPLAN TOKHANG na PNP.
Onong ed kinen Candelario, anggapo ni so agawan unya ed luyag. Makasiguro met kuwantonya saray residente na Pangasinan ya agto ya payagan ya nagawa na Provincial Director da.
Siniguro met nen Candelario, ed publiko ya ag makaapekto ya ed trabaho dan siguraduin ya ligtas tan maayos so probinsya.