Patay ang isang 50-anyos na jeepney driver dahil sa pag-awat sa dalawang magkapatid na nagtatalo habang nakainom sa Brgy. Maticmatic, Sta. Barbara.
Kinilala ang biktima na si Manny Dela Peña, residente ng Block 21 Lot 3 Sampaguita St. Maticmatic Housing, sa naturang barangay.
Batay sa imbestigasyon, nanggaling umano sa lamay ang biktima nang makita niya ang suspek na si Jeffrey Gloria, 28-anyos na vendor at residente naman ng Zone 7 Block 20 Lot 11 Maticmatic Housing na nakikipagtalo o nagkakaroon ng argumento sa kaniyang nakababatang kapatid na kinilala namang si Jeric Gloria, 22-anyos.
Dito na sinubukan ng nasambit na jeepney driver na pahupain ang init ng kanilang pagtatalo ngunit sinaksak umano ito ng suspek gamit ang kutsilyo o kitchen knife sa kaniyang dibdib.
Naitakbo pa ang biktima sa Rural Health Unit (RHU) Sta. Barbara at kalauna’y dinala sa Mapandan Community Hospital ngunit idineklara ng dead-on-arrival.
Nagsagawa ng follow-up investigation ang Sta. Barbara Police Station na nagresulta sa pagkaaresto sa nasambit na suspek at dinala na sa kanilang kustodiya para sa wastong disposisyon.
