DAGUPAN CITY- Sugatan so apatiran totoo kaibay taloran menor de edad diad banggaan na motorsiko tan tricycle diad baley na Mapandan, Pangasinan.
Umpapaway diad imbestigasyon na Mapandan PNP, ya legan ya unbabatik so tricycle ya imamaneho nen John Nicole dela Rosa, 15-anyos, tan residente na Barangay Amanoaoac, diad baley na Mapandan, diad pasagur ya direksyon ed barangay Aserda diad abitlan baley nen bigla labat lan binmangga dia so motorsiklo ya imamaneho nen Mark Simon, 19-anyos, tan residente diad abitlan barangay .
Resulta tonya, saray duwara kaiba iray pasahero na tricyle ya kinabat ya sikara di Caezar Lim tan Rolan Guba, parehon 15-anyos tan residente na baley na Mapandan so akagamot na saray sugat diad nanduruman parte na laman da.
Tampolan met iran inawit diad patambalan balet apaleenana na pigaran oras so inyalis si Mark Simon diad Region 1 Medical Center ed siyudad na Dagupan makasengeg ta grabe sugat tod kawanan ya Sali.
Kaleganan tonya, akabatan na saray otoridad ya inalay linya na motorsiklo so tricycle ya sengegan na aksidente.
