Nagtipon ang mga stakeholder ng industriya ng bangus mula sa iba’t ibang bahagi ng bansa para sa isinagawang Third Bangus Congress, na naging pagkakataon para pag-usapan ang mga hamon na kinakaharap ng sektor, gayundin ang mga bagong teknolohiya at inobasyong maaaring makatulong sa mga bangus operator.
Dinaluhan ang aktibidad ng mga kinatawan mula Luzon hanggang Mindanao, kasama ang mga opisyal ng Bureau of Fisheries and Aquatic Resources o BFAR at ng Philippine Milkfish Industry Group o FILMIG.
Ayon kay Aldo Sibayan, na nahalal bilang Vice President for Northern Luzon ng FILMIG, mahalaga ang naturang pagtitipon upang mapag-usapan ng mga nasa industriya ang mga posibleng solusyon sa kanilang mga suliranin at mga hakbang para higit pang mapalakas ang sektor.
Sa pamamagitan ng naturang kongreso, nabigyan ng pagkakataon ang mga kinatawan ng industriya na magpalitan ng kaalaman at pananaw hinggil sa mga teknolohiyang maaaring makatulong sa kanilang hanapbuhay.
Para kay Sibayan, mahalaga ang patuloy na pag-uusap at pagtutulungan ng mga stakeholder at ng pamahalaan upang matukoy ang mga konkretong hakbang na makatutugon sa mga pangangailangan ng industriya ng bangus.
