DAGUPAN CITY– Emosyunal ya pinawil na asaway pulis ya inatey diad enkuwentro na PNP tan NPA diad baley na San Nicolas Pangasinan nen imbeneg ya agew na Biyernes iray sampot dan inpantongtong diad telepono na asawa tonya kaleganan ya saya so manpapanabos.
Onong esd kinen Katrina Tamondong, asawa nen PO2 Aris Tamondong, akatawag ni asawa to bandad ala 6 na kabuwasan ed say agew ya agawa so engkwentro tan kinumusta toninya iray anak to.
Binilin to ni nen PO2 Tamondong so duwara dan ilalak ya no antoy labay dan saliwen so saliwen da labat ta walay labay daranyan salian ya contest.
Nanpatanir kono iya ya unla-laran manakar paaarap ed operasyon da. Kasumpalan ton naipatnubang so anak dad eskwelahan tan makapawil diad panbabangat to so akaawat iya na tawag.
Nangel to konon amin so maksil ya paltugan tan saray kakaiba na asawa to ya uniiyag tan tatawegen so ngaran nen PO2 Tamondong ya ibabagan naknay bala.
Inkuwanto ya adurog durog so puso to legan ya dedengelen so paltugan tan pantatawag dad ngaran na asawa to ya ibabagan saragen to ni.
Imbaga ni na misis diad abitlan phone call ya alagaren toy asawa to tan manilalon makasempet ni iya bangbalet agla akasempet ya mabilay.
