DAGUPAN CITY- Sugatan ang 3 lalaki na sakay ng isang motorsiklo sa Brgy. Lubong, bayan ng San Jacinto matapos makabangga ng asong tumatawid sa kalsada.
Ayon sa mga otoridad, hating gabi nang makatanggap ng tawag ang mga kapulisan hinggil sa naturang aksidente na kinasasangkutan ng isang 19-anyos na nagmamaneho ng motorsiklo kasama ang mga angkas nito na nasa edad 18-19 anyos. Ang mga ito ay pare-parehong residente ng Brgy. Sta Cruz sa parehong bayan.
Lumalabas sa paunang imbestigasyon na aksidente nilang nabangga ang isang aso biglaang tumawid habang tinatahak ang kanlurang direksyon.
Ito ang naging sanhi ng pagkahulog ng kanilang sinasakyang motorsiklo sa kalsada.
Nagtamo naman ng sugat sa katawan ang dyaber at mga angkas nito. Agad naman silang dinala sa pagamutan para sa paunang lunas.
Maging ang kanilang sinasakyan ay nagtamo ng pinsala subalit hindi pa tukoy ang kabuoang halaga nito.
Samantala, sa karagdagang imbestigasyon ay napag-alaman na nasa ilalim ng impluwensya ng alak ang nagmamaneho dahil sa pagpositibo nito sa alcohol breath test.
