DAGUPAN CITY– Inatey so 3 anyos ya ogaw kasumpalan ya abangga na tricycle nen naandi kontrol diad manibela so driver legan ya sikaray unbabiyahe diad karukuyan na National Road na Brgy. Pilar, baley na Sta Maria, Pangasinan.
Kinabat so biktima ya si Hanna Avery Arguiza, 3 -anyos tan residente a Brgy. Pila, Sta. Maria.
Kinabat met so driva tricycle ya si Omar Salamanca, 46 anyos, tan residente na Brgy. Guiset Sur, San Manuel legan ya saray pasahero tonya so kinabat ya sikara di Carlos Enrico Llamas, 20 anyos, estudyante tan Troy Mico Mendezabal, 14 anyos, ya parehon manaayam diad abitlan lugar.
Umpapaway diad imbestigasyon na pulisya ya kaleganan ya manbabiyahe ra paunlad baley na Rosales tan kasabi dad arapan na Arguizas residence so diman met la naandi kontrol diad manibela so driver na tricycle tan aksidenten abangga so biktima ya akaalagey diad gilig na kalsada.
Imbatik ya tampol so biktima diad patambalan bangbalet saya so indeklaran dead on arrival na say attending physician.
Anggapo met so asugatan diad saramay akalugan na tricycle.
Diad kaplesan, say driber na tricycle so wala ed kustodiya na Sta Maria PNP.
