DAGUPAN CITY– Kulong so sakey ya 22-anyos ya laki diad baley na Rosales, Pangasinan ya sangkot diad kaso na inpanabuso ed menor de edad ya nainaro to duway taon la so linmabas.
Based impormasyon na saray otoridad, kinabat so suspek ya si Marvin Pine ya residente na Barangay San Angel, baley na Rosales. Naaresto ed bisa na warrant of arrest so suspek parad kason rape.
Onong ed kinen SPO2 Oliver Bingua, imbestigador na Rosales PNP, akabatan ya datin inaro na suspek so biktima no iner agaway insidente sa nen taon 2015. Inkuwanton nen saman nainaro na suspek so biktima ya menor de edad ni tan alokonan to.
Pilit iran pinansiyan na saray atateng na bii ta agda labay so suspek tan kasumpalan toman sikato so insegepan na kason rape tan inaresto na saray otoridad kasumpalan na duway taon.
Onong ed ley,nayarin nasegepan na kason rape so sakey ya laki anggano ni kusan inmaboloy so inaro to ya walay nagawa diad sikara no menor de edad so kapareha to.
Akakulong la so suspek diad Rosales Police Station tan anggapoy piyansa parad temporaryon pakapaway tonya.
