Nansumpal ed ermen so maliket ya bakasyon na sakey aya pamilya kasumpalan ya nalener so duwaran membro na pamilya da ya ogogaw diad Bonuan Tondaligan Beach, barangay Bonuan, Dagupan City.
Kinabat iray biktima ya sikara di Angel Tan Garcia, 5 anyos, grade 1 student tan Mesha Lhorraine Tan Wee , 6 anyos,, grade 1 student tan parehon residente na Block 14 Lot 33, Palmera, Bulacan.
Onong ed imbestigasyon, nanlapu ni diad Bulacan, linma so abitlan pamilya piyan manames diad abitlan lugar karuman kabansag na Huwebes santo.
Maliket liket ya kasiba na saray biktima so pamilya da nen agawa so insidente. Tampol met ya imbatik diad ospital so duwaran biktima bangbalet indeklara ran dead on arrival na attending physician da diad Decena Hospital diad met ed sayan ciudad.
