DAGUPAN CITY—Duara so inatey legan na samplora so asugatan kaiba so driver na sakey mitsubishi adventure nen binmangga iya ed sakey keyew ya narra ed baley ya Sison, Pangasinan.
Kinabat so duaran inatey na di Gloria Punzalan tan Maring Cacalda, parehon residente ed barangay Poponto ed baley ya Bautista kasumpalan iran akagamor na grabin sugat ed laman da lapod aksidente.
Asugatan met so saray arom ya lugan na di Beverly Punzalan, Lucille Gonzales; Eduardo Baldivicio; Dolores Cacabilos, Filipina Uvpon; Bryan Gonzales, Grace Punzalan, Iavez Punzalan, tan John Alfred Baldivicio, residente ra ed baley ya Bautista.
Diad imbestigasyon akalirep so driver na si Efren Punzalan na kaiba ed say asugatan kanian nibangga so luganan da ed say keyew na narra.
Nibatik ni ra ed ospital so biktima balet indeklaran dead on arrival so duara ed saray biktima.
