DAGUPAN CITY – Inatey so sakey ya menor de edad legan ya kritikal tan oobserbaan nid ospital so sakey ya kaiba to kasumpalan ya nalner diad dayat diad Binmaley, Pangasinan.
Kinabat so biktima ya si Ronalyn Castillo, 12 anyos legan ya samay kaiba to et si Ayesha Quitaleg na Grade 12 student ya kaplesan ya manpapaabig diad patambalan.
Diad impituyaw na Bombo Radyo Dagupan ed kinen Police Chief Inspector Danilo Perez, Deputy chief of police na Binmaley PNP kinompirma ton ‘dayo’ labat iray biktima tan linma labat ed sakey ya family reunion.
Onong ed opisyal, personal ton pinasyar so lugar ya akagawaan na insidente tan anengneng ton atagey so lebel na danum diad dayat tan angkakabaleg so daluyon ya posiblen sengegan na impakakanalner na duwaran ogaw.
Tampol met ya inawit diad ospital so duwaran ogogaw no iner maswerteng naisalba si Quitaleg bangbalet, indeklaran dead on arrival so 12 anyos ya si Castillo.
Kaleganan tonya, patuloy so gagaween ya imbistigasyon na aray otoridad.
