DAGUPAN CITY– Asugatan so 18 too kabiangan so duwaran menor de edad kasumpalan ya apigar so niluganan dan minibus kayarin binmangga ed concrete barrier diad samay gagaween ya taytay diad barangay Bobonan, Pozorrubio, Pangasinan.
Onong ed say impormasyon, imamaneho na sakey ya Edwin Leonard Domenden so abitlan bus nen naandian iya na control tan binmangga diad concrete barrier ya walad gilig na kalsada ya sengegan na inpakagamor na saray biktima na sugat diad nanduruman parte laman da.
Kaslakan na saray biktima so taga Baguio City tan dinmalo irad Bible mission diad Tarlac.
Kinabat iray biktima ya sikara di Christian Ambojnon, Cyrelle Serquenza, Wifalyn Ricardo , Elizabeth Serna , Janna Jaramillo, Rene Jaramillo , Shirelyn Castro , Sophia Harmony Castro ,Lycca Abalde , Cristine Pajarillaga , Beejey Castro, 4 y/o, Javy Jaramillo , Stephanie Ragas , Julie Ann Dalisdis Jane Catanglan, Pablo Soriano tan Jhunie Naciza.
Maswerte balet ya agga asugatan so arum nin akalugan diad bus ya sikara di John Michael Manzano, Russel Brandon Casilen, Maica Jaramillo tan Polyshien Manzano ya residente diad ciudad na Baguio.
Tampol met ya inawit diad patambalan iray biktima. Tuloy ni natan so imbestigasyon ng kapulisan ed agawan insedente.
