DAGUPAN CITY – Masuwerteng akasalba so 13 sangkakanayon kabiangan so pigaran ogogaw kasumpalan ya napoolan so niluganan dan motorbanca diad dayat ya nasasakupan na ciudad na Alaminos.
Onong ed pulis, akaawat na report iray kabiangan na Philippine Coast Guard (PCG) diad baley na Sual, nilirad napopoolan ya motorbanca diad Lucap Wharf ed abitlan ciudad kanyang tampol met ran nanresponde.
Tampolan ya naisalba iray biktima antes ya nagnap ya aderal so niluganan da diad panamegley na sakey nin motorbanca ya manbiyabiyahe met ed saman.
Akabatan ya saray 13 biktima so mankakanayon ya nanlapu nid Mabalacat, Pampanga.
Diad inisyal ya imbestigasyon na saray otoridad, akalugan iray biktima ed motorbanca ya walay marking na Allan-7 nen biglan pinmool so gasoline container diad abay na makina sengegan na inpakapoolan na banka.
Anggaman anggapoy asugatan, inawit nin sansia iray biktima diad patambalan tan say sangkasamputan ya nalan impormasyon na Bombo Radyo Dagupan so akasempet metlara natan.
