DAGUPAN CITY– Masyadoy liket na saray kabiangan na 102nd Maritime Police Station kasumpalan ya makaawat na pamagalang bilang sakey ya unit awardee diad kakasumpal ya selebrasyon na 27th Founding Anniversary na PNP Maritime Group.
Diad ekslusibon impituyaw na Bombo Radyo Dagupan ed kinen P/Supt. Ruben Lacuesta, station chief na PNP 102nd Maritime Police Office diad luyag na Pangasinan, inkuwanton ipapasen dan “achievement” so abitlan pamagalang.
Inkuwanton agga naala so abitlan award no aliwan say malet ya inpanpursige na saray kakaiba da.
Say 102nd Maritime Police Station so initdan na pamagalang ya Maritime Police Station of the Year no iner mismon si PNP Chief Police Director General Ronald Dela Rosa so angiter ed sikato na award.
Kaleganan tonya, likod ed 102nd Maritime Police Station, tinanghal met ya Regional Maritime Unit of the Year so Regional Maritime Unit 7, Special Operations Unit of the Year so 2nd Special Operation Unit, tan Adopt a Marine Protected Area (AMPA) Project Handler of the Year so 101st Maritime Police Station.
