Isa ang patay habang 3 katao ang sugatan sa aksidente sa barangay Bolasi sa bayan ng San Fabian, Pangasinan.
Inabutan ng rescue team at mga pulis na nakahandusay na sa kalsada ang katawan ng tricycle driber habang naipit sa loob ng tricycle ang kasama nito .
Binabaybay ng tricycle driber na si Manolito de Francia, 48 anyos at ang kasama nito na si Alexander Gamboa ang national Highway nang mabangga ng kasunod na kotse.
Sa lakas ng impact ay tumilapon ang driber ng tricycle at sumalpok pa ang tricycle sa nakaparadang truck sa gilid ng kalsada.
Dead on arrival sa pagamutan ang biktima na si de Francia habang sugatan si Gamboa. Sugatan din ang driber ng kotse na si Estevan Elizarde mula sa Santiago, Ilocos Sur at kasamang si Margie Zalimel, tubong lungsod ng Baguio.
Samantala, inihahanda na ang kasong isasampa laban sa driber ng kotse.
