Dagupan City – Nagkaloob ang Department of Social Welfare and Development o DSWD ng kabuuang ₱60,000 tulong pangkabuhayan sa apat na residente ng Mangaldan sa ilalim ng Sustainable Livelihood Program.
Isinagawa ang pamamahagi sa Municipal Social Welfare and Development Office, kung saan tumanggap ng tig-₱15,000 ang bawat benepisyaryo bilang panimulang puhunan sa maliit na negosyo.
Ayon sa lokal na pamahalaan, layunin ng programa na matulungan ang mga pamilyang walang sapat na pinagkakakitaan at mabawasan ang epekto ng kahirapan sa komunidad.
Ang tulong ay bahagi ng patuloy na koordinasyon ng pamahalaang lokal at ng DSWD upang makapaghatid ng serbisyong panlipunan sa mga kwalipikadong residente.
Gagamitin ng mga benepisyaryo ang natanggap na halaga bilang kapital sa kani-kanilang planong pagkakakitaan, kabilang ang maliliit na negosyo sa kanilang mga barangay.
Inaasahang makatutulong ito upang madagdagan ang kita ng kanilang pamilya at matustusan ang pang-araw-araw na pangangailangan.
Samantala, tiniyak ng lokal na pamahalaan na magpapatuloy ang pakikipagtulungan sa iba’t ibang ahensiya ng gobyerno para sa pagpapatupad ng mga programang pangkabuhayan at iba pang serbisyong panlipunan para sa mga residenteng nangangailangan.
